Grunnskólinn á Hólmavík hefur fengið eftirfarandi bréf vegna gosmengunar og loftgæða. Kynnið ykkur endilega þær slóðir sem bent er á í leiðbeiningunum.

Leiðbeiningar fyrir leik- og grunnskóla

 

Almannavarnir, Umhverfisstofnun, Samband íslenskra sveitarfélaga og Sóttvarnalæknir hafa fengið nokkuð af fyrirspurnum frá leik- og grunnskólum um hvar upplýsingar megi finna varðandi gosmengunina. Almannavarnir gefa út tilkynningar þegar háir mengunartoppar ganga yfir og nauðsynlegt er að fólk haldi sig inni og loki gluggum. Athugið að mengunartoppar ganga jafnan hratt fyrir. Það breytir ekki því að gosmengun getur legið í loftinu í lægri styrk og við höfum því hvatt fólk til að treysta á eigin skynfæri og skynsemi. Ef fullorðnir finna fyrir einkennum og óþægindum og líður betur inni gildir það sama um börnin. Engin ástæða er til að ætla að SO₂ mengun sé hættilegri börnum en fullorðnum, að mati Sóttvarnalæknis.       

Á heimasíðum Umhverfisstofnunar og embættis Landlæknis er sérstakur borði merktur gosmenguninni og þar má nálgast allar almennar upplýsingar. Þar er til dæmis gagnlegt að skoða töfluna sem sýnir rétt viðbrögð við SO₂ mengun. Hún útlistar viðbrögð eftir styrk mengunar og eftir því hvort um heilbrigt fólk sé að ræða eða fólk sem er viðkvæmt. SO₂ taflan er aðgengileg hér: http://www.ust.is/einstaklingar/loftgaedi/so2/

Daglegar spár um dreifingu mengunarinnar og loftgæðin má nálgast á vef Veðurstofunnará slóðinni http://www.vedur.is/vedur/spar/textaspar/oskufok/ og styrkur mengunarinnar er mældur og miðlað á vefsíðunni www.loftgæði.is. Þar má sjá punkta og þegar smellt er á þá má sjá mælingu mengunarinnar á þessum stöðum. Ekki eru allir mælar á landinu nettengdir með þessum hætti en virkni þeirra tryggir að viðvaranir eru gefnar út þegar mengunartoppar ganga yfir. Fjölmiðlar gegna veigumiklu hlutverki við miðlum upplýsinga til almennings og því er nauðsynlegt að fylgjast grannt með þeim og fylgja leiðbeiningum almannavarna sem þar koma fram.

 

Reykjavík, október 2014.

Almannavarnadeild ríkislögreglustjóra

Umhverfisstofnun

Samband íslenskra sveitarfélaga

Sóttvarnalæknir

Minnum á viðtalstíma fræðslustjóra Guðjóns Ólafssonar, 16. október, klukkan 13:00 - 14:00 eins og fram kemur í áður útsendu bréfi til foreldra.

Kæru foreldrar

Aðalfundur foreldrafélags grunnskólans verður haldinn næstkomandi miðvikudag kl. 17:30 í Hnyðju.

Efni fundarins er :

• Mótun skólastefnu Strandabyggðar
• Skýrsla síðasta starfsárs
• Endurskoðun reikninga
• Kosning bekkjarfulltrúa
• Kosninga nýrra fulltrúa í foreldrafélagið
• Venjuleg aðalfundarstörf

Þeir foreldrar sem áhuga hafa á að vera fulltrúar í foreldrafélaginu eða bekkjarfulltrúar eru vinsamlegast beðnir um að láta núverandi fulltrúa foreldrafélagsins vita fyrir fundinn.

Við hvetjum ykkur til að mæta á fundinn svo að óskir foreldra verði sýnilegar í skólastefnu Strandabyggðar.

Hlökkum til að sjá ykkur!

Barbara Guðbjartsdóttir                   barbara@aknet.is
Guðrún Elínborg Þorvaldsdóttir         gunnaet@simnet.is
Kristjana Eysteinsdóttir                    kristjanaeysteins@simnet.is
Sverrir Guðmundsson                        sverrirgudm@gmail.com
Vignir Már Pálsson                            vp@internet.is

 

Minnum á starfsdaginn 3. október, en þá sækja kennarar haustþing Kennarasambands Norðurlands vestra á Blönduósi, almennir starfsmenn verða að störfum í skólanum en nemendur í fríi.

Verkefnið Göngum í skólann verður að þessu sinni frá miðvikudegi 24. sept. - miðvikudags 1. okt. Verkefninu lýkur með samveru í skógarrjóðri klukkan 13:30 - 14:30 þann 1. okt. Umhverfisnefnd skólans sér um dagskrá sem samanstendur af leikjum og grilluðu brauði. 

Grunnskólinn á Hólmavík tekur þátt í hreyfivikunni Move Week sem er samevrópskt verkefni sem sveitarfélagið Strandabyggð tekur þátt í og nær yfir dagana 29. sept. - 5. okt. Starfsmenn og nemendur skólans ætla að vera með Tíu mínútna morgunleikfimi utandyra klukkan 08:30 þessa viku. Öllum er velkomið að taka þátt í fjörinu!

Tónlist fyrir alla haustið 2014

 

TríóPa í Hólmavíkurkirkju 15.  september,

 klukkan 11:00 – 11:40

Dagskrá: Kjúklingur og annað fiðurfé
Flytjendur:
Hallveig Rúnarsdóttir - söngur
Jón Svavar Jósefsson - söngur
Hrönn Þráinsdóttir - píanó

Söngvararnir Hallveig og Jón Svavar og píanóleikarinn Guðrún Dalía, sem skipa TríóPa, leggja í þessu verkefni upp með skemmtilega dagskrá til þess að kynna klassíska söngtónlist fyrir börnum landsins. Hér koma við sögu ýmis furðudýr eins og skrýmsli, kurteisir kjúklingar og kettir sem skreppa til London, að ótöldum skötuhjúunum góðu, þeim Papageno og Papagenu úr Töfraflautu Mozarts.

Dagskráin er blanda af atriðum úr Töfraflautunni, dúettum og einsöngslögum eftir núlifandi íslensk tónskáld, sem skrifuð eru með börn í huga og þátttaka áheyrenda (nemendanna) er töluverð á tónleikunum.

Þau Hallveig, Jón Svavar og Dalía hafa öll vakið mikla athygli fyrir vandaðan og líflegan tónlistarflutning á undanförnum árum. Þau hafa öll unnið töluvert saman í gegn um tíðina í hinum ýmsu verkefnum, en þetta er fyrsta sjálfstæða verkefni tríósins TríóPa. 

Allir velkomnir!

Óhætt er að segja að gleði og gott veður hafi einkennt skólastarfið fyrstu viku skólaársins. Nemendur og starfsfólk Grunnskólans á Hólmavík hafa verið á ferð og flugi. Nemendur í 9. og 10. bekk hafa verið á námsferðalagi um Danmörku ásamt Önnu Birnu og Hrafnhildi, Ester og Gunnari sem voru fulltrúar foreldra í ferðinni. Allar upplýsingar benda til þess að ferðin hafi verið hin skemmtilegasta en hópurinn er væntanlegur heim til Hólmavíkur síðdegis með ferðasöguna í farangrinum.

Nemendur í 5. 6. og 7. bekk fóru á fimmtudegi í Ólafsdal með Hlyni, Ástu og Láru og tóku upp samtals 180 kíló af grænmeti sem sáð var til og sett niður síðastliðið vor. Sama dag fóru allir almennir starfsmenn skólans að Reykhólum en starfsmenn grunn- og leikskólanna á báðum stöðum sitja saman 70 kennslustunda námskeið. Að þessu sinni var dagurinn helgaður sjálfstyrkingu og samskiptatækni.
Íþróttatímar vikunnar voru á sparkvellinum við skólann og verða áfram þar í næstu viku ef veður helst gott. Vissara getur þó verið að taka með sér íþróttafötin þá daga sem íþróttir eru kenndar.  

Við minnum á að Skólasetning Grunn- og Tónskólans á Hólmavík verður í Hólmavíkurkirkju, föstudaginn 22. ágúst nk. kl. 12:00 . Eftir skólasetningu verður gengið fylktu liði yfir í skólann og þar fylgja kennarar nemendum í stofur og afhenda stundaskrá, skóladagatal, og fleiri gögn. Við hlökkum til að sjá ykkur

Hefðbundið skólastarf hefst eftir stundaskrá mánudaginn 25. ágúst kl. 08:30. 

Skólasetning Grunn- og Tónskólans á Hólmavík verður í Hólmavíkurkirkju, föstudaginn 22. ágúst nk. kl. 12:00 . Eftir skólasetningu verður gengið fylktu liði yfir í skólann og þar fylgja kennarar nemendum í stofur og afhenda stundaskrá, skóladagatal, og fleiri gögn.

Hefðbundið skólastarf hefst eftir stundaskrá mánudaginn 25. ágúst kl. 08:30

Starfsmenn skólans eru nú að hefja störf að nýju eftir sumarleyfi og undirbúningur fyrir skólaárið 2014-2015 gengur vel. Innkaupalistar birtast á bekkjarvef um leið og þeir eru tilbúnir. 

Við Grunn- og tónskólann á Hólmavík eru lausar stöður tónlistarkennara skólaárið 2014-2015 

Meðal kennslugreina við tónskólann er píanó, blásturshljóðfæri, gítar, bassagítar og söngur. Einnig kennsla í forskólahópi.

Umsóknarfrestur er til 8. ágúst 2014.

...
Meira