Laugardaginn 3. mars munu Gógó píurnar keppa á Samfés fyrir hönd félagsmiðstöðvarinnar Ozon á Hólmavík. Keppnin verður sýnd í beinni  á RÚV og hefst kl 13:00. Þau Gunnur Arndís, Brynja Karen, Margrét Vera, Sara og Fannar Freyr ætla að flytja lagið Lýstu skært, en upprunalega nafn lagsins er Way beound the blue. Það er Viðar Guðmundsson sem á heiðurinn af lagavalinu. Fleiri munu koma að atriðinu því Gógó píurnar hafa fjölmennt lið á bak við sig. Stella Guðrún, umboðsmaður Gógó píanna hefur tekið að sé að sauma kjóla á stelpurnar.

Unnur Ingimundardóttir ætlar að farða þær fyrir stóru keppnina og Kristín Lilja Sverrisdóttir sér um hárgreiðslurnar. Arnar Snæberg og Hildur Guðjónsdóttir hafa einnig staðið vel við bakið á stelpunum og haldið utan um atriðið. Laugardaginn 18. febrúar heimsóttu krakkarnir Heiðu Ólafs í útvarpshúsið þar sem hún hjálpaði þeim með atriðið og sviðsframkomu.

Gógó píurnar hafa fjöldann allan af stuðningsmönnum því 30 krakkar úr félagsmiðstöðinni Ozon fara í ferðina. Utan söngkeppninnar er fjölbreytt dagskrá. Farið verður í gokart, lazertag, bíó, skauta  og keilu auk þess sem farið verður á stóra samfés ballið sem haldið verður í Laugardalshöllinni.

Höfundar: Gunnur Arndís, Sara og Stella Guðrún

Íslenskunemar í 10. bekk skólans skrifa nú fréttir, undir leiðsögn Hrafnhildar Guðbjörnsdóttur íslenskukennara, sem munu birtast á næstunni hér á vef skólans og á www.strandir.is. Hlökkum til að fylgjast með því. Frábært framtak, vel skrifaðar og vandaðar fréttir hjá þeim!

Foreldrafélag Grunnskólans á Hólmavík heldur upp á gamlar hefðir og býður öllum börnum í Strandabyggð og nágrannasveitum að taka þátt í Öskudagsballi fyrir börnin miðvikudaginn 22. febúar, klukkan 17:00 í Félagsheimilinu á Hólmavík. Húsið fyllist af kátum krökkum, héðan og þaðan, og ef að líkum lætur skemmta allir sér konunglega. Foreldrar er hvattir til að koma með krakkana sína og fara í þrautakóng og slá köttinn úr tunnunni. Verðlaun verða veitt fyrir frumlegasta furðufatabúninginn.

Nú hefur sveitarfélagið Strandabyggð gefið öllum nemendum Grunnskólans á Hólmavík merkt endurskinsvesti til þess að tryggja öryggi þeirra í umferðinni. Mikilvægi þess að vera vel sýnilegur í umferðinni á jafnt við börn sem og fullorðna, hvort sem fólk er gangandi, hlaupandi eða hjólandi. Við fögnum því að Strandabyggð vilji tryggja að börnin okkar séu vel upplýst á dimmustu mánuðum ársins til að forða slysum. Börnin eru hvött til að nota vestið á leið til og frá skóla og við önnur tækifæri, til dæmis á leið í íþróttir og tómstundastarf.

 

Mikilvægt er að foreldrar og starfsfólk skóla hvetji og veiti því athygli hvort börnin þeirra séu sjáanleg í umferðinni og að foreldrar séu sjálfir til fyrirmyndar og noti endurskinsmerki. Hannes Leifsson yfirlögregluþjónn á Hólmavík kom og ræddi við börnin og fræddi okkur um hvernig hægt er að auka öryggi allra í umferðinni margfalt með því að nota þessi einföldu, léttu og þægilegu öryggistæki sem endurskinsvesti og endurskinsmerki eru. Börn sem eru með endurskin sjást miklu fyrr en ella eða í um 100 metra fjarlægð frá ökutæki. Nemendur fóru strax í vestin sín eins og sjá má á meðfylgjandi myndum og voru þakklát sveitarfélaginu fyrir umhyggjuna sem þeim hefur verið sýnd með þessari góðu gjöf og í þakkarskyni tóku þau lagið með viðstöddum.

Fimmtudaginn 16. febrúar eru foreldraviðtöl í Grunn- og Tónskólanum á Hólmavík. Foreldrar og forráðamenn hitta umsjónarkennara og ræða námsframvindu og líðan nemenda og hafa allir nemendur farið heim með blöð með tímasetningum hvers viðtals og margir fengið sömu upplýsingar með tölvupósti. Þann dag er frí hjá nemendum.

Bjarni Ómar skólastjóri vill hvetja alla sem óska eftir því að ná á hann um hvaðeina sem snýr að skólastarfinu, að koma við á skrifstofunni þegar hentar.  Einnig er velkomið að hafa samband í gegnum netfangið skolastjorar@holmavik.is eða í síma 451-3129 til að festa tíma. Flestir faggreinakennarar og almennir starfsmenn verða við til á tímanum 8:10-13:00.

Hlökkum til að sjá ykkur, heitt á könnunni og hlýjar móttökur.

Nú hefur sveitarfélagið Strandabyggð opnað smíðastofu fyrir eldri borgara á fimmtudögum frá kl. 14:00 - 17:00. Með smíðastofunni er verið að koma á fjölbreyttara félagsstarfi en á opnum íbúafundi með eldri borgurum sem Félagsþjónusta Stranda og Reykhólahrepps stóð fyrir í haust komu fram óskir þar um. Ingibjörg Sigurðardóttir mun hafa umsjón með smíðastofunni eins og félagsstarfinu sem boðið er uppá á þriðjudögum. Eldri borgarar eru hvattir til að nýta sér þetta nýja félagsstarf sem fer fram í Grunnskólanum í Hólmavík, nýju byggingunni. Allir velkomnir - heitt á könnunni!

Stella Guðrún Jóhannsdóttir er nemandi í 10. bekk og í Tónskólanum á Hólmavík. Mánudaginn 30. janúar þreytti hún stigspróf í flautuleik hjá prófanefnd tónlistarskóla í Reykjavík. Hljóðfæranámi er skipt niður í þrjú stig; grunnstig, miðstig og framhaldsstig og hefur Stella nú lokið grunnstiginu og fengið í hendur sérstakt skírteini þess efnis þar sem fram kemur að Stella hlaut einkunnina 9,0 á prófinu sem telst stórglæsilegur árangur. Stella Guðrún hefur lært flautuleik á þverflautu undir leiðsögn Barböru Óskar Guðbjartsdóttur kennara við Tónskólann. Aðspurð segist Stella Guðrún prófið hafa gengið vel og að hún hafi ekki hafa verið mjög stressuð í prófinu sjálfu en hún hafði kviðið svolítið fyrir því. Á leiðinni suður í prófið kom Stella við á Miðhúsum í Kollafirði hjá hjónunum og tónlistarkennurunum Barböru Ósk og Viðari til þess að æfa sig á lokasprettinum. Þegar til Reykjavíkur var komið áttaði Stella sig á að hún hafði gleymt í Miðhúsum geisladisk með undirleik sem hún ætlaði að nota í prófinu sjálfu og upphófst mikið stress við að útvega slíkan disk í Reykjavík sem reyndist erfitt en tókst þó að lokum. Eftir það var Stella Guðrún ekkert stressuð og því alveg sallaróleg í prófinu sjálfu sem kom sér bara vel. Allt er gott sem endar vel :) Við óskum Stellu Guðrúnu hjartanlega til hamingju með grunnstigið og þennan glæsilega árangur!

Í dag héldu 21 nemendur vestur til Súðavíkur á Vestfjarðariðil söngkeppni félagsmiðstöðva fyrir Söngkeppni Samfés sem haldin verður í kvöld. Þar keppa tíu atriði frá Vestfjörðum um að komast áfram í lokakeppnina sem haldin verður í Reykjavík fyrstu helgina í mars. Þar af eigum við þrjú glæsileg atriði en það er hún Elísa Mjöll Sigurðardóttir sem mun syngja lagið Með þér við texta Bubba Morthens, Brynja Karen Daníelsdóttir sem syngur lagið The Story, með íslenskum texta Arnars S. Jónssonar, og hópurinn GóGó-píurnar þau Brynja Karen Daníelsdóttir, Fannar Freyr Snorrason, Gunnur Arndís Halldórsdóttir, Margrét Vera Mánadóttir og Sara Jóhannsdóttir sem flytja lagið Do Lord með íslenskum texta Arnars S. Jónssonar. Það er tómstundafulltrúi Strandabyggðar sem fylgir hópnum ásamt Alfreð Gesti Símonarsyni bílstjóra og Bjarka Einarssyni sem verður fulltrúi Hólmavíkur í dómarasætinu í kvöld. Hópurinn heldur svo heim á leið eftir ball með stórstjörnunni Haffa Haff seint í kvöld. Við óskum þeim góðrar feðrar og góðs gengis í Vestfjarðakeppninni!

Kæru nemendur og foreldrar. Okkur langar að vekja athygli ykkar á að nú hefur Mentor sent frá sér nýja lausn fyrir snjallsíma sem hugsuð er fyrir foreldra og nemendur. Í þessar útgáfu má skoða stundatöflu, ástundun, bekkjarlista, fréttir frá skólanum og heimavinnu. Notendur þurfa fara inn á m.mentor.is og skrá sig inn með notanda- og lykiorði rétt eins og þegar þeir skrá sig inn á Mentor í tölvunni.

Föstudaginn 10. febrúar munu fjórir kennarar skólans sækja námskeiðið Kvíði barna og ungmenna. Á námskeiðinu verður fjallað um eðli og einkenni kvíða, af hverju börn verða kvíðin, hvernig kvíði birtist, hvernig hann viðhelst og hvernig æskilegt er að bregðast við kvíðahegðun. Farið verður yfir helstu kvíðaraskanir barna og unglinga, aðskilnaðarkvíða, almenna kvíðaröskun, fælni, ofsakvíða, félagskvíða, kjörþögli og áráttu-þráhyggjuröskun. Helstu viðhaldandi þættir verða kynntir s.s. ofvernd, forðun og hugsanaskekkjur. Fjallað verður um æskileg viðbrögð við kvíða barna og unglinga og notkun atferlismótunar til að takast á við kvíðahegðun. Kennslan byggir á fyrirlestrum um ofangreinda þætti og léttum hóp-verkefnum. Námskeiðið er haldið í fjarfundi í gegnum Fræðslumiðstöð Vestfjarða og Endurmenntun HÍ. Við fögnum því að starfsmenn okkar geti tekið þátt í námskeiði sem þessu hér í heimabyggð og er þátttakan liður í endurmenntun starfsmanna en endurmenntunaráætlun Grunnskólans á Hólmavík má lesa hér.

Sunna Karítas Oktavía Torfhildur Tildurrófa Aðaldal ræður ríkjum í Stundinni okkar sem sýnd er á RÚV alla sunnudaga. En hún er nú bara oftast kölluð Skotta. Skotta býr í Álfheimunum ásamt Rósenberg sem er virðulegt heldra skoffín. Í síðustu viku kom Stundin okkar til að taka upp hér á Hólmavík. Umsjónarmaður er Margrét Sverrisdóttir og handritshöfundur ásamt henni Oddur Bjarni Þorkelsson. Þau fylgdu nemendum í 3. bekk eftir, heimsóttu Galdrasýninguna, fóru í vettvangsferð um Hólmavík, heimsóttu skólann og leikskólann Lækjarbrekku, ræddu við nemendur í Tónskólanum og tóku upp nokkur lög með þeim. Það var mikil spenna og tilhlökkun í nemendahópnum sem skemmti sér afar vel við að taka þátt í þessu líflega verkefni. Efnið frá Hólmavík verður unnið og klippt niður og sýnt sem stutt innslög í Stundinni okkar í vetur. Við þökkum Stundinni okkar kærlega fyrir komuna og hlökkum til að fylgjast með sjónvarpsstjörnunum okkar á skjánum. Myndir frá vikunni má sjá með því að smella hér.